ಮೂಕಭಾಷೆ

"ಲಕ್ಷ್ಮಿ ಎರಡು ದಿನಗಳಿಂದ ಉಪವಾಸವಿದ್ದಾಳೆ. ಇಷ್ಟು ದಿನ ಹೇಗೋ ಸಂಭಾಳಿಸಿದ್ದೇನೆ, ಇನ್ನು ಅಸಾಧ್ಯವೆನಿಸುತ್ತಿದೆ ಕೂಡಲೇ ಹೊರಟು ಬಾ!", ಸುರೇಶನ ದೂರವಾಣಿ ಕರೆ ಸುಜಾತಳನ್ನು ಕಂಗೆಡಿಸಿತು. "ಆದಿಯನ್ನು ಈ ಸ್ಥಿತಿಯಲ್ಲಿ ಬಿಟ್ಟು ಹೇಗೆ ಹೋಗಲಿ?" ಎಂದು ಚಿಂತಿಸಿದಳು.
"ಪರವಾಗಿಲ್ಲ ಹೋಗಿ ಬನ್ನಿ ಆಂಟಿ, ನಾನು ಅವನನ್ನು 2 ದಿನ ಕಾಲೇಜಿಗೆ ರಜೆ ಹಾಕಿ ನೋಡಿಕೊಳ್ಳುತ್ತೇನೆ, ಹೇಗೂ ಟೈಫೋಯ್ಡ್ ಜ್ವರ ಅವನಿಗೀಗ ಇಳಿದಿದೆ ಇನ್ನು ಚಿಂತೆ ಇಲ್ಲ. ಪಾಪ ಅಂಕಲ್ಲಿಗೂ ಕುಯ್ಲು ಸಮಯದಲ್ಲಿ ಇಲ್ಲಿಗೆ ಬರುವುದು ಕಷ್ಟ", ಆದಿಯ ಸ್ನೇಹಿತ ಪ್ರಕಾಶ ಭರವಸೆ ನೀಡಿದ.
ಮನೆಯ ಅಂಗಳಕ್ಕೆ ಕಾಲಿಡುತ್ತಿದ್ದಂತೆ ಹುಲ್ಲಿನ ಕಟ್ಟು ತೆಗೆದುಕೊಂಡು ಸುಜಾತ ಕೊಟ್ಟಿಗೆಗೆ ಧಾವಿಸಿದಳು. ಲಕ್ಷ್ಮಿಯ ಮೈದಡವಿ ಹುಲ್ಲು ನೀಡಲು, ಒಂದೇ ಉಸಿರಿನಲ್ಲಿ ತಿಂದು ಮುಗಿಸಿ ತನ್ನ ಒಡತಿಯ ಕೈ ನೆಕ್ಕಲು ಶುರು ಮಾಡಿತು. "ನನ್ನ ಬಿಟ್ಟು ಎಲ್ಲೂ ಹೋಗಕೂಡದು" , ಎಂದು ಅದು ತನ್ನ ಮೂಕ ಭಾಷೆಯಲ್ಲಿ ಹೇಳಿದಂತೆ ಸುಜಾತಳಿಗೆ ಭಾಸವಾಗಿ ಪ್ರೀತಿಯಿಂದ ಮತ್ತೆ ಅದರ ಮೈ ಸವರಿದಳು.