ಅಲೆಮಾರಿ

ಹುಟ್ಟೂರಿನಲ್ಲೇ ಹುಟ್ಟಿದಾಗಿಂದ ಸಾಯುವತನಕ ಬೀಡು ಬಿಟ್ಟಿರುವ ಯೋಗ ಕೆಲವರದು
ನೆಲ ಜಲ ಸಂಸ್ಕೃತಿ ಭಾಷೆ ಬವಣೆಯೊಂದಿಗೇ ಬದುಕು ಕಟ್ಟಿಕೊಂಡವರು ಇವರು
ಇನ್ನು ಕೆಲವರು ಅಲೆಮಾರಿಗಳು
ಹುಟ್ಟೂರೊಂದು ಬೆಳೆದೂರೊಂದು ವ್ಯಾಪಾರಕ್ಕೊಂದು ವೃದ್ಧಾಪ್ಯಕ್ಕೊಂದು
ಇಲ್ಲಿಯೂ ಸಲ್ಲದವರು ಅಲ್ಲಿಯೂ ಸಲ್ಲದವರು
ಕೊನೆಗೆ ಎಲ್ಲಿಯೂ ಸಲ್ಲದವರು
ಇವರಿಗೆ ನೆಲ ಜಲದ ಹಂಗಿಲ್ಲ
ಆದರೆ, ಅಲೆದೂ ಅಲೆದೂ
ವರ್ಷಗಳೇ ಕಳೆದು
ಯಾವುದೋ ಗಮ್ಯ ತಲುಪಿದಾಗ
ಹುಟ್ಟೂರಿನ ಮೋಹ ಕಾಡುವುದಾಗ
ಇವರು ಅಲೆಮಾರಿಗಳು
ಅಲ್ಲಿಗೂ ಹೋಗಲಾರರು
ಇಲ್ಲೂ ಇರಲಾರರು
ಬೇರು ಗಟ್ಟಿ ಇಲ್ಲ
ಹಾರಲು ರೆಕ್ಕೆಯಿಲ್ಲ
ಅಲೆಯುವುದೊಂದೇ ತಿಳಿದಿರುವುದು
ಎಲ್ಲ ಸುಸ್ಥಿತಿಗೆ ಬರುವಷ್ಟರಲ್ಲಿ ಪುನಃ ಗುಳೆ ಹೊರಡುವ ಸಮಯ
ಪಾತ್ರೆ ಪಗಡೆಗಳೊಂದಿಗೆ ನೆನಪುಗಳ ಮೂಟೆಕಟ್ಟಿ
ಹೊರಟಾಯಿತು ಮುಂದಿನ ಊರಿಗೆ