ಮಕ್ಕಳಿಗೆ ಕಥೆ ಹೇಳುವುದರಿಂದಾಗುವ ಪ್ರಯೋಜನಗಳು

ಕಥೆಗಳೆಂದರೆ ಯಾವ ಮಕ್ಕಳಿಗೆ ಇಷ್ಟವಿಲ್ಲ? ಎಲ್ಲರಿಗೂ ಇಷ್ಟ. ನಮ್ಮ ಬಾಲ್ಯದ ಸವಿನೆನಪುಗಳಲ್ಲಿ ಅಜ್ಜ, ಅಜ್ಜಿ, ಅಪ್ಪ, ಅಮ್ಮ ಬಿಡುವಿದ್ದಾಗ ಹೇಳುತ್ತಿದ್ದ ಕಥೆಗಳೂ ಒಂದು. ರಾತ್ರಿ ಮಲಗುವ ವೇಳೆ, ವಿದ್ಯುತ್ ಕಡಿತವಾಗಿ ಚಿಮಣಿ ಬುಡ್ಡಿ ಹಚ್ಚಿ ಕೂತ ವೇಳೆ ಅಥವಾ ಇನ್ಯಾವಾಗಲೋ ಹೊತ್ತು ಹೋಗದಾದಾಗ ಕಥೆ ಹೇಳಿರೆಂದು ದೊಡ್ಡವರನ್ನು ನಾವೆಲ್ಲರೂ ಪೀಡಿಸಿದ್ದಿದೆ. ಆದರೆ, ಈಗ ನಮ್ಮ ಮಕ್ಕಳಿಗೆ ನಾವೆಷ್ಟು ಕಥೆಗಳನ್ನು ಹೇಳುತ್ತಿದ್ದೇವೆ? ಕೆಲಸದ ಒತ್ತಡ, ಸಮಯದ ಅಭಾವ ಅಥವಾ ಮೊಬೈಲ್, ಟಿವಿ ಪ್ರಭಾವದಿಂದಾಗಿ ಮಕ್ಕಳಿಗೆ ಕಥೆ ಹೇಳುವ ಪದ್ಧತಿ ನಿಧಾನವಾಗಿ ಕಣ್ಮರೆಯಾಗುತ್ತಿದೆ. ಹೆಚ್ಚೆಂದರೆ, ಟಿವಿ ಅಥವಾ ಮೊಬೈಲಿನಲ್ಲಿ ಅವರ ನೆಚ್ಚಿನ ಕಾರ್ಟೂನ್ ಅಥವಾ ನೀತಿ ಕಥೆಗಳ ಸರಣಿಯನ್ನು ಹಾಕಿಕೊಟ್ಟೇವು.
ನಾವೆಲ್ಲರೂ ಪಂಚತಂತ್ರ ಕಥೆಗಳ ಬಗ್ಗೆ ಕೇಳಿದ್ದೇವೆ, ಓದಿದ್ದೇವೆ ಅಲ್ಲವೇ? ಅಮರಶಕ್ತಿಯೆಂಬ ರಾಜ ತನ್ನ ಮೂವರು ಮೂರ್ಖ ಮಕ್ಕಳನ್ನು ಹೇಗೆ ವಿದ್ಯಾವಂತರನ್ನಾಗಿ ಮಾಡುವುದೆಂದು ಮಂತ್ರಿಗಳೊಡನೆ ಸಮಾಲೋಚಿಸುತ್ತಾನೆ. ಸಾಂಪ್ರದಾಯಿಕವಾಗಿ ವಿದ್ಯೆ ಕಲಿಯಲು ಹತ್ತಾರು ವರ್ಷಗಳೇ ಬೇಕಿರುವಾಗ, ಶೀಘ್ರವಾಗಿ ಮಕ್ಕಳನ್ನು ವಿದ್ಯಾವಂತರನ್ನಾಗಿ ಮಾಡಲು ಸಕಲಶಾಸ್ತ್ರಕೋವಿದನಾದ 80 ವರ್ಷದ ವಿಷ್ಣುಶರ್ಮನೆಂಬ ಬ್ರಾಹ್ಮಣನಲ್ಲಿ ಬಿಡಬೇಕೆಂದು ನಿರ್ಧಾರವಾಗುತ್ತದೆ. ವಿಷ್ಣುಶರ್ಮನು ಆರು ತಿಂಗಳುಗಳಲ್ಲಿ ಅವರನ್ನು ನೀತಿಶಾಸ್ತ್ರದಲ್ಲಿ ಕೌಶಲರನ್ನಾಗಿ ಮಾಡುತ್ತೇನೆಂದು ಅವರಿಗಾಗಿ ಪಂಚತಂತ್ರವೆಂಬ ಗ್ರಂಥವನ್ನು ರಚಿಸಿ ಬೋಧಿಸುತ್ತಾನೆ. ಅದೊಂದು ಸಣ್ಣ ಸಣ್ಣ ನೀತಿ ಕಥೆಗಳನ್ನು ಒಂದರೊಳಗೊಂದು ಅನ್ಯೊನ್ಯವಾಗಿ ಹೆಣೆಯಲ್ಪಟ್ಟ ಸರಣಿಯಾಗಿದೆ. ಪ್ರಾಣಿಗಳೇ ಮುಖ್ಯ ಪಾತ್ರಧಾರಿಗಳು. 6 ತಿಂಗಳು ಮುಗಿಯುವುದರ ಒಳಗೆ, ಮೂರ್ಖರಾಗಿದ್ದ ರಾಜಕುಮಾರರು ಬುದ್ಧಿವಂತರಾಗಿ, ರಾಜ್ಯದ ಹೊಣೆ ಹೊರಲು ತಕ್ಕವರಾಗಿರುತ್ತಾರೆ. ಇದರಿಂದ ತಿಳಿಯುವುದೇನೆಂದರೆ, ಕಥೆಗಳು ಎಷ್ಟು ಪರಿಣಾಮಕಾರಿ ಎಂದು.
ಮಕ್ಕಳಿಗೆ ಕಥೆ ಹೇಳುವುದರಿಂದ ಹಲವಾರು ಪ್ರಯೋಜನಗಳಿವೆ

• ಸದ್ಗುಣಗಳನ್ನು ಬೆಳೆಸಲು ಸಹಕಾರಿ

ನೀತಿ ಕಥೆಗಳ ಮೂಲಕ ಮಕ್ಕಳಲ್ಲಿ  ಧೈರ್ಯ, ಚಾಣಾಕ್ಷತನ, ಪ್ರಾಮಾಣಿಕತೆ, ಪರೋಪಕಾರ, ಕೃತಜ್ಞತಾಭಾವ ಮುಂತಾದ ಸದ್ಗುಣಗಳನ್ನು ಬೆಳೆಸಬಹುದು. ಕಥೆಗಳನ್ನು ಪರಿಣಾಮಕಾರಿಯಾಗಿ ಹೇಳಿದಷ್ಟೂ ಅವರ ಮನಸ್ಸಿನಲ್ಲಿ ಅವುಗಳು ಅಚ್ಚಾಗಿ ಉಳಿಯುತ್ತವೆ. ಎಲ್ಲೋ, ಯಾವುದೋ ಸಂದರ್ಭದಲ್ಲಿ, ಕಥೆಗಳಿಂದ ಕಲಿತ ಪಾಠ ಸಹಾಯಕ್ಕೆ ಬರುತ್ತದೆ.

• ಕಲೆ, ಸಂಸ್ಕೃತಿಗಳ ಪರಿಚಯ

ವಿವಿಧ ದೇಶ, ಭಾಷೆ, ಕಲೆ, ಸಂಸ್ಕೃತಿ, ಹಬ್ಬ ಹರಿದಿನಗಳು, ಆಚರಣೆಗಳು, ಖಾದ್ಯಗಳು ಹೀಗೆ ಪ್ರತಿಯೊಂದು ವಿಚಾರಗಳೂ ಕಥೆಗಳ ಮೂಲಕ ಅವರಿಗೆ ತಿಳಿಯಪಡಿಸಬಹುದು. ಇದರಿಂದ ಗಡಿಗಳನ್ನೂ ಮೀರಿ ಹಲವು ವಿಷಯಗಳಲ್ಲಿ ಅವರ ಜ್ಞಾನ ವೃದ್ಧಿಸುತ್ತದೆ. ಅಲ್ಲದೆ ಪುರಾಣ, ಇತಿಹಾಸದ ಕಥೆಗಳನ್ನೂ ಮಕ್ಕಳಿಗೆ ಪರಿಚಯಿಸಿ.

• ಭಾಷಾಜ್ಞಾನ ಸುಧಾರಣೆ

ಮಕ್ಕಳಿಗೆ ಹೊಸ ಪದಗಳ ಪರಿಚಯ ಮಾಡಿಕೊಡಬಹುದು. ಪದಗಳ ಉಚ್ಚಾರಣೆ, ಅರ್ಥ, ಬಳಕೆ ಮುಂತಾದವನ್ನು ತಿಳಿಸಿಕೊಡಬಹುದು. ಇದರಿಂದ ಅವರ ಭಾಷಾಜ್ಞಾನ ಹೆಚ್ಚುತ್ತದೆ. ಭಾಷೆಯ ಬಗ್ಗೆ ಒಲವು ಮೂಡುತ್ತದೆ. ಅಲ್ಲದೆ, ಅವರ ಸಂವಹನ ಕೌಶಲ್ಯ ಸುಧಾರಣೆಯಾಗುತ್ತದೆ.

• ಕಲ್ಪನಾಶಕ್ತಿ ಮತ್ತು ಕ್ರಿಯಾಶೀಲತೆ ಹೆಚ್ಚಿಸುತ್ತದೆ

ಮಕ್ಕಳಿಗೆ ಎರಡು ರೀತಿಯ ಕಥೆಗಳನ್ನು ಹೇಳಬಹುದು. ಒಂದು, ವಿವಿಧ ಪಾತ್ರಗಳನ್ನು ಸೃಷ್ಟಿಸಿ ಅವುಗಳ ಸುತ್ತ ಕಥೆ ಹೆಣೆದು ಹೇಳುವುದು, ಎರಡನೆಯದು, ನಿಮ್ಮ ಮಕ್ಕಳನ್ನೇ ಒಂದು ಪಾತ್ರವಾಗಿಟ್ಟುಕೊಂಡು ಕಥೆ ಹೆಣೆಯುವುದು. ಈ ಎರಡನೆಯ ರೀತಿಯ ಕಥೆಗಳು ಹೆಚ್ಚಿನ ಮಕ್ಕಳಿಗೆ ಹಿಡಿಸುತ್ತದೆ, ಅವರ ಕಣ್ಣಲ್ಲಿ ಒಂದು ಹೊಳಪು ಮೂಡುತ್ತದೆ. ಯಾವುದೇ ಶೈಲಿಯಲ್ಲಿ ಕಥೆ ಹೇಳಿದರೂ ಮಕ್ಕಳು ಕಲ್ಪನಾ ಲೋಕಕ್ಕೆ ಹೋಗಿ ನೀವು ಹೇಳುವ ಪಾತ್ರಗಳು, ಜಾಗಗಳು, ಘಟನೆಗಳು ಮುಂತಾದವುಗಳನ್ನು ಮನದಲ್ಲಿ ಮೂಡಿಸಿಕೊಳ್ಳುತ್ತಾರೆ. ಇದರಿಂದ ಅವರ ಕಲ್ಪನಾಶಕ್ತಿ ಹಾಗೂ ಕ್ರಿಯಾಶೀಲತೆ ಹೆಚ್ಚುತ್ತದೆ. ಕೆಲವೇ ದಿನಗಳಲ್ಲಿ ಮಕ್ಕಳು ಅವರೇ ಕಥೆ ಹೆಣೆದು ನಿಮಗೆ ಹೇಳುತ್ತಾರೆ ನೋಡಿ! ಇದನ್ನು ಯೌಟ್ಯೂಬ್ನಲ್ಲಿ ನೀವು ಹಾಕಿ ಕೊಡುವ ವಿಡಿಯೋದಿಂದ ಪಡೆಯಲಾರಿರಿ.

• ಜ್ಞಾಪಕಶಕ್ತಿ ಹೆಚ್ಚಳ

ನೀವು ಅವರ ಮುಂದೆ ಪುಸ್ತಕದಿಂದ ಓದಿ ಹೇಳಿದ ಅಥವಾ ಹಾಗೇ ಹೇಳಿದ ಕಥೆಗಳನ್ನು ಅವರಿಂದ ಮತ್ತೆ ಹೇಳಿಸಿ. ಕೆಲವು ದಿನಗಳ ನಂತರವೂ ಹೇಳಿಸಿ. ಇದು ಅವರ ಜ್ಞಾಪಕಶಕ್ತಿ ವೃದ್ಧಿಸಲು ಒಂದು ವ್ಯಾಯಾಮವಾಗುತ್ತದೆ.

• ಓದುವ ಹವ್ಯಾಸ

ಕಥೆಗಳನ್ನು ಮಕ್ಕಳ ಮುಂದೆ ಓದಿ ಹೇಳುವುದರಿಂದ ಅವರಲ್ಲಿ ಓದುವ ಹವ್ಯಾಸಕ್ಕೆ ನಾಂದಿಯಾಗುತ್ತದೆ. ದೊಡ್ಡವರಾಗುತ್ತಿದ್ದಂತೆ, ಅವರೇ ಕಥೆಗಳನ್ನು ಓದಿ ಅರ್ಥೈಸಿಕೊಳ್ಳಲು ಶುರು ಮಾಡುತ್ತಾರೆ.
ಇಷ್ಟೇ ಅಲ್ಲದೆ, ನಾವು ಹೇಳುವ ಉತ್ತಮ ಕಥೆಗಳಿಂದ ಮಕ್ಕಳಿಗೆ ಮುಂದೆ ಜೀವನದಲ್ಲಿ ಕಷ್ಟಗಳನ್ನು ಎದುರಿಸಲು, ಸವಾಲುಗಳನ್ನು ಸ್ವೀಕರಿಸಲು, ನೋವನ್ನು ಸಹಿಸಿಕೊಳ್ಳಲು, ಧೈರ್ಯದಿಂದ ಮುನ್ನುಗ್ಗಲು ಒಂದಲ್ಲಾ ಒಂದು ರೀತಿಯಲ್ಲಿ ಸಹಕಾರಿಯಾಗುತ್ತದೆ.
ಇನ್ನು ಮುಂದೆ ನಿಮಗೆ ಬಿಡುವಿದ್ದಾಗ, ಕೆಲಸ ಮಾಡುವಾಗ, ಮಕ್ಕಳೊಂದಿಗೆ ವಾಯು ವಿಹಾರಕ್ಕೆ ಹೋದಾಗ, ಪ್ರಯಾಣ ಮಾಡುವಾಗ ಹೀಗೆ ಸಾಧ್ಯವಾದಾಗಲೆಲ್ಲ ಖಂಡಿತ ಕಥೆ ಹೇಳಲು ಮರೆಯದಿರಿ.