ನೂರೊಂದು ನೆನಪುಗಳು

ವಾರ ತಿಂಗಳು ವರ್ಷಗಳು ಉರುಳಿ
ದಶಕ ಕಳೆದರೂ ಮಾಸದ ನಿಮ್ಮ ನೆನಪು ಮನದೊಳಗೆ
ನಿಮ್ಮನ್ನು ನೆನೆಯದ ದಿನಗಳು ಕೇವಲ ಬೆರಳೆಣಿಕೆಯಷ್ಟು ಇಲ್ಲಿಯವರೆಗೆ

ಹಲವಾರು ಸುಖ ದುಃಖದ ಕ್ಷಣಗಳಲ್ಲಿ
ಕಾಡಿತ್ತು ನೀವಿಲ್ಲದ ಭಾವ
ನಿಮ್ಮನ್ನು ನೆನೆ ನೆನೆದು ಮರುಗಿದ್ದೆಷ್ಟು
ಈ ಜೀವ

ನಾವು ಒಟ್ಟಿಗೆ ಕಳೆದ ದಿನಗಳು ಕ್ಷಣಗಳಂತೆ ಕಳೆದುಹೋಗಿ ಮಿಂಚಿ ಮರೆಯಾಗಿದೆ
ಪುನಃ ಆ ಕಾಲಕ್ಕೆ ಹಿಂದಿರುಗಿ ಹೋಗುವ
ಮನಸ್ಸಾಗಿದೆ

ನಾವಿಬ್ಬರೂ ಒಬ್ಬರಿಗೊಬ್ಬರು ಬರೆಯುತ್ತಿದ್ದ ಕಾಗದದ ಅಕ್ಷರಗಳೆಲ್ಲ
ಮುಂದೊಂದು ದಿನ ನಿಮ್ಮ ನೆನಪಿನ ಕುರುಹಾಗಿ ಉಳಿಯುವುದೆಂದು ನಾ ಅಂದು ಅರಿಯಲೇ ಇಲ್ಲ

ನಮ್ಮ ನಡುವೆ ನಡೆಯುತ್ತಿದ್ದ ಸಂಭಾಷಣೆ, ವಾದ, ಚರ್ಚೆಗಳೆಲ್ಲ
ಇಂದಿಗೂ ನೆನಪಾಗಿ ಕಾಡುವುದಲ್ಲ

ಬತ್ತಿಹೋಯಿತು ನಿಮ್ಮ ಕಡೆಯಿಂದ ಹರಿದು ಬರುತ್ತಿದ್ದ ಹೊಗಳಿಕೆ ಕಟು-ಟೀಕೆ ಸಲಹೆ ಉಪದೇಶಗಳ ಒರತೆ
ಇಂದಿಗೂ ಕಾಡಿದೆ ನಿಮ್ಮ ಆ ಸ್ನೇಹದ ಮಾತುಗಳ ಆತ್ಮೀಯ ಸ್ಪರ್ಶದ ಕೊರತೆ

ನಿಮ್ಮ ನೋಟ ನಗು ಜಾಣ್ಮೆ ಮಾತು ಗುಣ ಸ್ವಭಾವ ಪ್ರತಿಯೊಂದೂ
ಅಚ್ಚಳಿಯದೇ ಉಳಿದಿದೆ ಮನದಲ್ಲಿ ಎಂದೂ

ನಿಮ್ಮ ಹಳೆಯ ಸೀರೆಯೇ ನನ್ನ ಮಕ್ಕಳಿಗೆ ಬೆಚ್ಚನೆಯ ಕೌದಿಯಾದಾಗ
ಅವರ ಆಟ ಪಾಠಗಳನ್ನೆಲ್ಲ ನಾ ಕಂಡಾಗ ಆಗುವ ನಿಮ್ಮ ಅನುಪಸ್ಥಿತಿಯ ಅನುಭವ
ಕಣ್ಣುಗಳು ಹೊರ ಹಾಕುವವು ಹೃದಯದ ನೋವ

ನಾ ಹೆಚ್ಚು ಹೆಚ್ಚು ನಿಮ್ಮನ್ನು ನೆನೆದಾಗಲೆಲ್ಲ ಕನಸಿನಲ್ಲಿ ಬಂದು ಕಾಣಿಸಿಕೊಳ್ಳುವ ನಿಮ್ಮ ಔದಾರ್ಯಕ್ಕೆ ಧನ್ಯವಾದ
ನಿಮಗೆ ಎಲ್ಲರಿಗಿಂತ ನನ್ನ ಮೇಲೇ ಹೆಚ್ಚು ಪ್ರೀತಿ ಎಂಬುದು ನಿರ್ವಿವಾದ

ಮನೆಯ ಹಳೆಯ ಫೋಟೋ ಆಲ್ಬಮ್ಗಳಲ್ಲಿ
ಸೆರೆಯಾಗಿರುವ ನಿಮ್ಮ ಛಾಯಾಚಿತ್ರಗಳಂತೆ
ನನ್ನ ಮನಸ್ಸು ಹೃದಯದಲ್ಲಿ ನಿಮ್ಮ ನೆನಪುಗಳ ಛಾಯೆ ಶಾಶ್ವತವಾಗಿ ಸೆರೆಯಾಗಿವೆ ಬೆಚ್ಚಗೆ ಅಡಗಿ ಕುಳಿತಿವೆ

ಈ ಎಲ್ಲ ನೆನಪುಗಳಿಂದಲೇ ನೀವು ನಮ್ಮ ಮಧ್ಯೆ ಇನ್ನೂ ಜೀವಂತ
ನನ್ನದು ಒಂದೇ ಪ್ರಾರ್ಥನೆ, ನಿಮ್ಮ ಆತ್ಮಕ್ಕೆ ಚಿರಶಾಂತಿ ನೀಡಲಿ ಆ ಭಗವಂತ

ನೀವು ಕಣ್ಮರೆಯಾದ ಮೇಲೂ ಮುಂದುವರೆದಿದೆ ನಮ್ಮಿಬ್ಬರ ಪಯಣ  ನೆನಪಿನ ದೋಣಿಯಲ್ಲಿ
ಎಷ್ಟು ದೂರ ಸಾಗಿದರೂ ಮುಗಿಯದ ಸಾಗರದಾಳದ ನನ್ನ ಮನಸಿನಲ್ಲಿ