ಮಾತೃಭಾಷೆ

ಎಲ್ಲರ ಮಾತೃಭಾಷೆ ಕನ್ನಡವೇ ಆಗಿದ್ದರೂ ಕೂಡ ಆ ಗೆಳತಿಯರ ಗುಂಪಲ್ಲಿ ಆಂಗ್ಲ ಭಾಷೆಯ ಕಲರವವೇ ಹೆಚ್ಚಾಗಿತ್ತು. ಅದರಲ್ಲೂ ನಯನಳಂತೂ ಕನ್ನಡ ಮಾತನಾಡುವುದೇ ಅವಮಾನವೆಂಬಂತೆ ಆಡುತ್ತಿದ್ದಳು. ಹಾಗಾಗಿ ಕನ್ನಡಾಭಿಮಾನಿ ಕಾವ್ಯಳಿಗೂ ಇವಳಿಗೂ ಸದಾ ಜಟಾಪಟಿ ಆಗುತ್ತಿತ್ತು. 

ಅಂದು ಗೆಳತಿಯರೆಲ್ಲ ಯಾವ ಸಿನೆಮಾಗೆ ಹೋಗುವುದು ಎಂದು ಚರ್ಚಿಸುತ್ತಿದ್ದಾಗ, ನಯನ ತಾನಂತೂ ಕನ್ನಡ ಚಿತ್ರ ನೋಡಲು ಬರುವುದೇ ಇಲ್ಲ ಎಂದು ಖಡಾಖಂಡಿತವಾಗಿ ಹೇಳಿದಾಗ ಕಾವ್ಯಳಿಗೆ ರೋಸಿ ಹೋಯಿತು. 

ಮಾಡುತ್ತೇನೆ ಇವಳಿಗೆ ಎಂದು ಕಾವ್ಯ ನಯನಳ ಕೈಗೆ ಚಿವುಟಿದಳು. ಕೂಡಲೇ ಕಿಟಾರನೆ ನಯನ ಕಿರುಚ್ಚಿದ್ದು 'ಅಮ್ಮಾಆ...' ಎಂದು. ಸಿಟ್ಟಿನಿಂದ ಅವಳು ಕಾವ್ಯಳ ಕಡೆ ನೋಡಲು, ಕಾವ್ಯಳು "ನೋವಾದಾಗ ಯಾವ ಭಾಷೆ ನಿನ್ನ ಬಾಯಲ್ಲಿ ಬರುತ್ತದೆ ಎಂದು ನೋಡಬೇಕಿತ್ತು" ಎಂದು ಕಣ್ಣು ಮಿಟುಕಿಸಿದಾಗ ನಯನಳಿಗೆ ತನ್ನ ತಪ್ಪಿನ ಅರಿವಾಗಿ ನಾಚಿಕೆಯಾಯಿತು.