ದೊಡ್ಡಮ್ಮನ ನೆನಪು

ಬರೆದದ್ದು - 26/04/2016
ದೊಡ್ಡಮ್ಮ, ಕಾಡುತಿದೆ ನಿಮ್ಮ ನೆನಪು ಸದಾ
ಜಿನುಗುತಿದೆ ಕಣ್ಣಲ್ಲಿ ಕಂಬನಿ
ನಿಮ್ಮ ಆಶೀರ್ವಾದ ಸದಾ ಇರಲಿ
ದುಃಖ ಕಷ್ಟಗಳ ದೂರ ತಳ್ಳಲಿ

ಕಣ್ಣ ಮುಂದೆ ಮೂಡುವುದು ನಿಮ್ಮ
ಚಿತ್ರ ಹಲವು ಬಾರಿ
ಮಾತನಾಡುತ್ತಿರುವಂತೆ ಭಾಸವಾಗುವುದು
ನನ್ನ ಬೆನ್ನು ಸವರಿ

ಸುಕ್ಕುಗಟ್ಟಿದ ನಿಮ್ಮ ಕೈ ಚರ್ಮ, ಕನ್ನಡಕದ
ಹಿಂದಿನ ನಿಮ್ಮ ಕಣ್ಣ ನಗು
ಎಲ್ಲ ಕಣ್ಣ ಮುಂದೆ ಬಂದಂತಾಗುವುದು
ಕೊನೆಗೆ ನಿಟ್ಟುಸಿರು ಮಾತ್ರ ಎದೆಯಿಂದ ಹೊರ ಹೋಗುವುದು

ನಿಮ್ಮ ಸ್ಥಾನ ಯಾರೂ ತುಂಬಲಾರರು
ಪುಣ್ಯವಂತರು ನಾವು ನಿಮ್ಮ ಒಡನಾಟ ಸಿಕ್ಕಿದ್ದು
ನೋಡ ನೋಡುತ್ತಿದ್ದಂತೆ ಮಾಯವಾದಿರಿ
ಅಷ್ಟೇ ಏನೋ ನಾವು ಪಡೆದು ಬಂದದ್ದು

ನೋಡುತ್ತಿರುವಿರಾ ನಮ್ಮನ್ನೆಲ್ಲ ಎಲ್ಲಿಂದಲೋ?
ನಾವು ನಕ್ಕರೆ ನೀವೂ ನಗುವಿರೇನೋ
ನಮ್ಮ ಕಂಬನಿ ನಿಮಗೆ ನೋವು ತರದಿರಲಿ
ನಿಮ್ಮ ಆತ್ಮಕ್ಕೆ ಚಿರಶಾಂತಿ ಇರಲಿ

ಎಷ್ಟು ಬರೆದರೂ ತೃಪ್ತಿ ಇಲ್ಲ ನಿಮ್ಮ ಬಗ್ಗೆ
ನತದೃಷ್ಟೆ ನಾನು ಉಳಿಸಿಕೊಳ್ಳಲಾಗಲಿಲ್ಲ ನಿಮ್ಮನ್ನು ಕೊನೆಗೆ
ನಿಮ್ಮ ನೆನಪುಗಳು ಮಾತ್ರ ಇನ್ನು ಮುಂದೆ ಸದಾ ನನ್ನ ಜೊತೆಗೆ