सेंचुरी

आज सचिन का शर्ट है हरा
इसलिये उसने सेंचुरी मारा

ಪ್ರೀತಿ

ಪ್ರೀತಿ ಇಲ್ಲದ ಜೀವನ ಬಹಳ ಬೇಸರ 
ಪ್ರೀತಿ ಮೂಡಿಸುವುದು ಬಾಳಲಿ ನೇಸರ 
ಪ್ರೀತಿಯಲಿ ಇರದೆಂದು ಮತ್ಸರ 

ಪ್ರೀತಿಯಲ್ಲಿರುವುದು ಕಾತರ 
ಎಲ್ಲದರಲ್ಲೂ ಆತುರ 
ಪ್ರೀತಿಯ  ಮಹಿಮೆ ಅಪಾರ 

ಪ್ರೀತಿಯೇ ಹೃದಯದ ಝೇಂಕಾರ 
ಪ್ರೀತಿಯ ದಾರಿ ಬಲು ವಿಸ್ತಾರ 
ಪ್ರೀತಿಯೇ ಬದುಕಿಗೆ ಆಧಾರ 

ಪ್ರೀತಿಯಿಲ್ಲದ ಬದುಕು ನಿಸ್ಸಾರ 
ಏಕೆಂದರೆ ಪ್ರೀತಿಯೇ ಆ ತರ 

ಪರಿಣಾಮ

ನಲ್ಲೆ , ನಿನ್ನ ಕಣ್ಣಲ್ಲಿ

ಕಡಲಾಳದಷ್ಟು ಪ್ರೀತಿ ಕಂಡೆನು

ಕಂಡು ಮನಸು ಸೋತೆನು

ಅಂದೇ ಮಾರು ಹೋದೆನು

ಆ ಕಡಲಿನಲ್ಲಿ ಜಿಗಿದೆನು

ಈಜಿ ದಡವ ಸೇರಿದೆನು

ನಿನ್ನ ಪ್ರೀತಿಯ ಪಡೆದೆನು

ನಾನು ನಿನ್ನವನಾದೆನು

ನಿನ್ನೊಳಗೊಂದಾದೆನು 

ಕೈ ಹಿಡಿಯಲು ಮುಂದಾದೆನು

ಈ ಜಾಗವನೆ ಮರೆತೆನು

ಪ್ರೀತಿಯ ಬಿಂದುವಾದೆನು

ಪ್ರೇಮದ ಚಿಲುಮೆಯಾದೆನು 

ಕೊನೆಗೆ ಕವಿಯೂ ಆದೆನು

ಇಗೋ ಇದ ನಿನಗಾಗಿ ಗೀಚಿದೆನು

ಸ್ವರ್ಗ ಸುಖ

ಇನಿಯ , ನಿನ್ನೀ ಕಣ್ಣುಗಳು 
ಆಡುತ್ತಿವೆ ನೂರಾರು ಮಾತುಗಳು 
ಮುರಿಯುತ್ತಿದೆ ಈ ಮೌನವು 

ಇನಿಯ , ನಿನ್ನೀ ಅದರಗಳು 
ನೀಡುತ್ತಿದೆ ಸಿಹಿ ಜೇನನು 
ಮರೆಸುತ್ತಿದೆ ಈ ಜಗವನು 

ಇನಿಯ , ನಿನ್ನೀ ನಾಲಿಗೆಯು 
ಜಪಿಸುತ್ತಿದೆ ನನ್ನದೇ ಹೆಸರನು 
ಮಾಡುತ್ತಿದೆ ಕರ್ಣಾನಂದವನು 

ಇನಿಯ , ನಿನ್ನೀ ಬಾಹುಗಳು 
ಆಗಿದೆ ಬೆಚ್ಚನೆಯ ಹೊದಿಕೆಯು 
ನೀಡುತ್ತಿದೆ ಪ್ರೀತಿಯ ಸವಿಯನು  


ಇನಿಯ , ನಿನ್ನೀ ಹೃದಯವು
ನೀಡಿದೆ ಪ್ರೀತಿಯ ಸಿಂಹಾಸನವನು
ಉಣಿಸುತ್ತಿದೆ ಪ್ರೇಮದ ಸವಿಯನು

ಸತ್ಯ

ಈ ಜೀವನ ಬಹಳ ಬೇಸರ 
ದಿನವೂ ಬದುಕು ಬಹಳ ದುಸ್ತರ 
ಮೂಡಬಾರದೇ  ಆಶಾಕಿರಣದ ನೇಸರ 
ಎಂದು ಮೂಡುವನೋ ಎಂದು ಕಾತರ 
ಕಾತರಕ್ಕಿಂತ ಹೆಚ್ಚು ಆತುರ 
ಕಾಲನ ವೇಗ ತುಂಬಾ ವಿಸ್ತಾರ 
ತಾಳ್ಮೆಯೊಂದೆ  ಇದಕ್ಕೆ ಪರಿಹಾರ

ಸೀರೆ

ಸೀರೆ ಸೀರೆ ಸೀರೆ 
ಸೀರೆ ಉಟ್ಟ ನೀರೆ 
ಬಾನಿಂದ ಧರೆಗೆ 
ಇಳಿದು ಬಂದ ಅಪ್ಸರೆ 

ಕವಲುದಾರಿ

ಗೆಳೆಯ , ಜೀವನದಲ್ಲಿ 
ನನ್ನ ದಾರಿ ಬೇರೆ 
ನಿನ್ನ ದಾರಿ ಬೇರೆ 
ಬಿಡಿಸಿ ಬೇರೆ ಹೇಳಬೇಕೇ ?
ನಮ್ಮಿಬ್ಬರದು ಕವಲುದಾರಿ 

ವಾಸ್ತವ

ಜೀವನವೆಂಬು ಒಂದು ಹೋರಾಟ 
ನಾವು ಮಾಡಲೇಬೇಕಿಲ್ಲಿ ಕಾದಾಟ 
ಆಗ ಮಾತ್ರ ಸಾಧ್ಯ ಹಾರಿಸಲು 
ನಮ್ಮ ಗೆಲುವಿನ ಬಾವುಟ 

ಬಯಕೆ

ಇನಿಯ ,
ನಾನೆಂದೂ ಇರಬೇಕು ನಿನ್ನ ಸನಿಹ 
ಇದರಲ್ಲಿ ಕಿಂಚಿತ್ತಾದರೂ ಆದರೆ ವ್ಯತ್ಯಯ 
ಆಗುವುದು ನನ್ನ ಸ್ಥಿತಿ ಅಯೋಮಯ 

ನೆನಪು

ನೆನಪುಗಳ ಬುತ್ತಿ ಬಿಚ್ಚಿ ನೋಡಿದರೆ
ಬಲು ವಿಶಾಲವದರ ವಿಸ್ತಾರ 
ಆ ಸವಿ ನೆನಪುಗಳ ಸಿಹಿಯೇ
ಮುಂದಿನ ಬದುಕಿಗೆ ಆಧಾರ

ನೆನಪುಗಳು ಮಧುರ, ಅತಿ ಮಧುರ
ಅದರ ಸ್ಪರ್ಶ ಸುಂದರ ಸುಮಧುರ
ಅದರ ಅನುಭವ ಮನೋಹರ
ಆದರೆ ಕೆಲವೊಮ್ಮೆ ಮೂಡುವುದು ಬೇಸರ

ಓ ನೆನಪೇ, ನೀ ನನ್ನ ಕಾದದಿರು
ತಿಳಿಯಾದ ಈ ವಾಸ್ತವ ಕಾದಾಡದಿರು
ಈ ಒಂಟಿ ಬಾಳಿನಲ್ಲಿ, ನೀ
ಕೇವಲ ಸಂಗಾತಿಯಾಗಿರು

ಸ್ವಯಾರ್ಜಿತ

ಕಾಲವೆಂದೂ ಚಲಿಸದೆ ನಿಲ್ಲದು 
ಅದನ್ನರಿತರೆ ಗೆಲುವು ನಮ್ಮದು 
ಜ್ಞಾನವೆಂದೂ ಸಿಗದೇ ಉಳಿಯದು 
ಅದನ್ನರಿತರೆ ಬದುಕು ನಮ್ಮದು 

ಅನಾಹುತ

ಗೆಳೆಯ ನಿನಗಾಗಿ ನಾನೆಷ್ಟು ದಿನ ಕಾದೆ 
ಆದರೆ , ನೀ ಬಹಳ ತಡವಾಗಿ ಬಂದೆ 
ಅಷ್ಟರಲ್ಲಿ ಜೀವನದ ರೈಲು ಬಂಡಿ ಹೋಗಿತ್ತು ಮುಂದೆ 
ಟಿಕೆಟ್ಟು ಖರೀದಿಯಲ್ಲಿ ನೀ ಉಳಿದೆ ಹಿಂದೆ 

ವ್ಯತ್ಯಾಸ

ನನ್ನಾಕೆಯ ಹೆಸರು ಭಾರತಿ 
ಮದುವೆಯ ಹೊಸದರಲ್ಲಿ ನಾ ಅವಳನ್ನು
 ಕರೆಯುತ್ತಿದ್ದೆ  ಬಾ ರತಿ 
ಈಗಾಗಿದೆ ಅವಳ ಭಾರ ಅತಿ 

ಕನ್ನಡಾಭಿಮಾನ

ಬಂದಿತೆಂದರೆ ನವೆಂಬರ್ ಒಂದು 
ಕನ್ನಡ ಕನ್ನಡ ಎನ್ನುವವರಿಗಿಲ್ಲ ಕುಂದು 
ಮುಗಿಯಿತೆಂದರೆ ನವೆಂಬರ್ ತಿಂಗಳು 
ಆಗುವುದು ಕನ್ನಡವು ತಂಗಳು 

ವಿಪರ್ಯಾಸ

ಮನದ ಮೂಲೆಯಲ್ಲೆಲ್ಲೋ ಅಡಗಿದ್ದ 
ಆ ಪಿಸು ಮಾತುಗಳು 
ಹೊರಗೆ ಬಂದದ್ದು ಮಾತ್ರ 
ಕಂಬನಿಯ ಮೂಲಕ 

ಮೊರೆ

ಎತ್ತ ಹೋದರತ್ತ ಕತ್ತಲೆ 

ಇನ್ನೆತ್ತ ಸಾಗಲಿ ನಾ ?

ಕತ್ತಲೆಯ ಬದಿಗೊತ್ತಿ ನಿನ್ನತ್ತ ಕರೆದುಕೋ 

ಕೃಪೆಯಿರಲಿ  ಓ ವಿಧಾತಾ 

ಕನಸು

ಎಲ್ಲರೂ ಕಾಣುವುದು
ಒಂದೇ ಕನಸು
ತಾವು ಕಂಡ ಕನಸು
ಆಗಬೇಕೆಂದು ನನಸು

ನಾಮಕರಣದ ಕರೆಯೋಲೆ

ನಮ್ಮ ಮನೆಗೊಬ್ಬಳು
ವಿಶೇಷ ಅತಿಥಿ ಬಂದಿರುವಳು
ನಮ್ಮ ಕುಟುಂಬಕ್ಕೆ ಹೊಸ ಸೇರ್ಪಡೆ ಇವಳು
ಶ್ವೇತ ಮತ್ತು ಕೃಪಾನಿಧಿಯ ಮಗಳು
                   ಪುಟ್ಟಿ,ಪುಟಾಣಿ ಗಿಣಿ,ಚಿನ್ನಿ,ಗುಂಡು,ಬಂಗಾರು
                   ಹೀಗೆ ಇವಳಿಗೆ ಮುದ್ದು ಹೆಸರುಗಳು ಹಲವಾರು
                   ಆದರೂ ಇವಳಿಗೊಂದು ವ್ಯವಹಾರ ನಾಮ ಕೊಡಲು ಇಚ್ಛಿಸಿದೆವು
                   ಅದಕ್ಕಾಗಿ ನಿಮಗೀ ಕರೆಯೋಲೆ  ಕಳಿಸಿದೆವು
26-01-2012 ರಂದು ನಡೆಯುವ ನಾಮಕರಣ ಮಹೋತ್ಸವಕ್ಕೆ
ಚಾಮರಾಜಪೇಟೆಯ ಕೃಷ್ಣ ವಾದಿರಾಜವೇ ನಾವಾರಿಸಿದ ಸ್ಥಳ
ಅಂದು ನೀವುಗಳೆಲ್ಲ ತಪ್ಪದೇ ಅಲ್ಲಿಗೆ ಬಂದು
ಸೇರಬೇಕೆಂದು ನಮ್ಮ ಹಂಬಲ
                   ಸಮಾರಂಭದಲ್ಲಿ ಪಾಲ್ಗೊಂಡು ಮಗುವಿನ
                   ಆಯುರಾರೋಗ್ಯಕ್ಕಾಗಿ ಆಶೀರ್ವದಿಸಿ
                   ಹೀಗೆಂದು ಕೋರುವ 
                   ನಿಮ್ಮೆಲ್ಲರ ವಿಶ್ವಾಸಿ 

ವೈದ್ಯ ಕುಟುಂಬ                                         ಉಡುಪ ಕುಟುಂಬ

ಮರೀಚಿಕೆ

ಜೀವನವೆಂಬುದು ಬರೀ ಮರೀಚಿಕೆ 

ಮರೀಚಿಕೆಯೆಂಬ ಈ ಜಿಂಕೆ 

ಕರೆದೊಯ್ಯುವುದು ನಮ್ಮನು ಪ್ರಪಾತಕೆ 

ಇಲ್ಲವಿದಕೆ ಯಾವ ಅಂಕೆ ಶಂಕೆ 

ಪುಟ್ಟ

ನನ್ನಯ ತಮ್ಮ ಪುಟ್ಟ 
ಅಬ್ಬಾ! ಇವನದೆಂತಹ ಹಠ 
ಆಡುವನು ಚಿನ್ನಿ ದಾಂಡಿನಾಟ 
ಪಕ್ಕದ್ಮನೆ ಕಿಟಕಿ ಗಾಜು ಒಡೆಯಲು 
ಒಂದೇ ಏಟಿಗೆ ಓಡುವನು  ಓಟ  

ಮರೆತ ಕವಿತೆ

ನಾ ಅದನ್ನು ಅಂದು 
ಬರೆಯಲು ಮರೆತೆ 
ಅದಿಂದು ಹೊಸ ರೂಪ ತಾಳಿ 
ಆಯಿತೊಂದು ಕವಿತೆ 

ಕಂಬನಿ

ಬಾನಿಂದ ಬಿದ್ದ ಮುತ್ತು 

ಇಬ್ಬನಿ 

ಕಣ್ಣಿಂದ ಬಿದ್ದ ಮುತ್ತು 

ಕಂಬನಿ 

ಇಬ್ಬನಿ

ಬಾನಿಂದ ಧರೆಗೆ ಬಿತ್ತೊಂದು ಮುತ್ತು 
ಮುತ್ತಲ್ಲವದು ಬಿದ್ದ ನೀರ ಹನಿಯು 
ನೀರಲ್ಲವದು ಒಂದು ಸಣ್ಣ ಬಿಂದು 
ಬೆರಲ್ಲವದು ಮುಂಜಾನೆಯ ಇಬ್ಬನಿಯು 

ವಿಪರ್ಯಾಸ

ಏನೂ ಇಲ್ಲದಿದ್ದಾಗ 
ಬಹಳ ಇತ್ತು ಆಸೆ 
ಎಲ್ಲವೂ ಇರಲೀಗ 
ಅದೇಕೋ ಜಿಗುಪ್ಸೆ 

ಕೋಗಿಲೆ

ಕುಹು ಕುಹು ಎನ್ನುವ ಕೋಗಿಲೆಯೇ
ನನ್ನ ಮೆಚ್ಚಿನ ಕೋಗಿಲೆಯೇ
ಮಾಮರದಲ್ಲಿ ಕುಳಿತಿರುವ
ಚಿನ್ನದ ಕಂಠದ ಐಸಿರಿಯೆ
ಮರದಲಿ ನೀನು ಕುಳಿತಿರಲು
ನಿನ್ನಯ ಸುತ್ತಲು ಎಲೆ ಎಲೆಯೇ
ಮೊಟ್ಟೆಯನಿಕ್ಕಲು ಕಾಗೆಯ ಗೂಡನು
ಏತಕೆ ನೀನು ಹುಡುಕಿರುವೆ
ನನ್ನ ಮೆಚ್ಚಿನ ಕೋಗಿಲೆಯೇ
ಕಂದು ವರ್ಣದ ಕೋಗಿಲೆಯೇ
ಹೊಗಳಲು ಜಂಬ ಪಡಬೇಡವೇ
ನೀನೇನು ಸುಂದರಿಯೇ?
ನಮ್ಮ ಸರೋಜಿನಿ ನಾಯ್ಡು ಕೂಡ
ನಿನ್ನಂತೆಯೇ ಕೋಗಿಲೆಯೇ ! !

ನೇಚರ್

ನೇಚರ್ ನೇಚರ್ ನೇಚರ್
ಇದೇ ನಮ್ಮ ಟೀಚರ್
ಈ ಸುಂದರ ಕ್ರಿಯೇಚರ್
ರೂಪಿಸುವುದು ನಮ್ಮ ಫ್ಯೂಚರ್
ನಾವು ಮಾಡಲು ಹೊರಟಿಹೆವು ಅಡ್ವೆಂಚರ್
ಆದ್ದರಿಂದ ಅದರ ಸ್ಥಿತಿಯೀಗ ಡೇಂಜರ್
ನಮ್ಮ ಕಣ್ಣ ಮುಂದೆಯೇ ಇದೆ ಅದರ ಪಿಕ್ಚರ್
ಅದನ್ನು ರೂಪಿಸುವುದರಿಂದ ಬೆಳೆಯುವುದು ನಮ್ಮ ಕಲ್ಚರ್

ಕಾಮನಬಿಲ್ಲು

ಧೋ ಎಂದು ಮಳೆಯು ಸುರಿಯುತಿರಲು
ಆಗಸದಿ ಮೋಡ ಮುಸುಕಿರಲು
ಪ್ರಶಾಂತವಾದ ವಾತಾವರಣವಿರಲು
ಕಾಣಿಸಿತ್ತು ಸಪ್ತ ವರ್ಣದ ಕಾಮನಬಿಲ್ಲು

ಹಕ್ಕಿ

ಹಕ್ಕಿ ಹಕ್ಕಿ ಬಣ್ಣದ ಹಕ್ಕಿ
ಆಗಸದೆತ್ತರದಿ ಹಾರುವ ಹಕ್ಕಿ
ಪಟ ಪಟ ಎಂದು ರೆಕ್ಕೆಯ ಬಡಿಯುತ
ಮುಗಿಲೆತ್ತರದಿ ಹಾರುವ ಹಕ್ಕಿ
ಹಕ್ಕಿ ಹಕ್ಕಿ ಬಣ್ಣದ ಹಕ್ಕಿ
ಅಂಗಳಕ್ಕೆ ಬಂದು ತಿನ್ನುವುದು ಅಕ್ಕಿ
ಭವಿಷ್ಯವ ಹೇಳುವ ಸುಂದರ ಹಕ್ಕಿ
ಅದೇ ನನ್ನ ನೆಚ್ಚಿನ ಹಾಲಕ್ಕಿ

ಹೀಗೊಂದು ಕನಸು

ಅಲ್ಲೊಂದು ಭಯಾನಕ ಕಾಡು
ಅಲ್ಲಿ ಪ್ರಾಣಿಗಳ ಹಿಂಡು
ಆನೆಯು ಘೀಳಿಟಿತ್ತು
ಸಿಂಹ ಹುಲಿಗಳು ಘರ್ಜಿಸಿತು
ಗೂಬೆಯು ದುರುಗುಟ್ಟಿ ನೋಡಿತು
ಹಾವು ಬುಸ್ಸೆಂದಿತು
ನಾನು ಕಿಟಾರನೆ ಕಿರುಚಿದ್ದೆ
ಮಂಚದಿಂದ ಬಿದ್ದಿದ್ದೆ
ಆಗ ತಿಳಿಯಿತು
ನಾ ಕಂಡದ್ದು ಕನಸು
ಆಗದಿದ್ದರೆ ಸಾಕಾದು ನನಸು

ಕವಿತೆ

ನಾನು ಬರೆದೆ ಸುಂದರ ಕವಿತೆ
ನನ್ನ ನಲ್ಲೆಗೆ
ಅದನ್ನು ಓದಿ ಬಿಸಾಡಿದಳು
ಕಸದ ತೊಟ್ಟಿಗೆ

ಭ್ರಮೆ-ಮರೀಚಿಕೆ

ಜಿಂಕೆಯು ನೆಗೆದಾಡುತಿದೆ
ಕೋಗಿಲೆಯು ಹಾಡುತಿದೆ
ನವಿಲು ನರ್ತಿಸುತಿದೆ
ನದಿಯು ಝುಳು ಝುಳು ಹರಿಯುತಿದೆ
ಗಾಳಿಯು ತಂಪಾಗಿ ಬೀಸುತಿದೆ
ಹಕ್ಕಿಗಳು ಗಗನದೆತ್ತರದಿ ಹಾರುತಿದೆ
ಪುಷ್ಪಗಳು ಅರಳುತಿವೆ
ದುಂಬಿಯು ಝೇಂಕರಿಸುತಿದೆ
ಜೇನು ಮಕರಂದ ಹೀರುತಿದೆ
ಅಗೋ! ಮೀನು ಈಜುತಿದೆ
ಹಲವು ಮನೋಹರ ದೃಶ್ಯ!!
ಇವೆಲ್ಲವೂ ಸಾಧ್ಯ ಕಾಡಿನಲಿ
ಆದರೆ ಇದು ಅಸಾಧ್ಯ ನಾಡಿನಲಿ

ರೊಕ್ಕ

ನನ್ನ ಗೆಳತಿ ರೇಖಾ
ಹಾಕ್ತಾಳ ತರತರಹದ ಫ್ರಾಕ
ನಂಗೂ ಇಷ್ಟ ಹಾಕಾಕ
ಆದರೆ ಯಾರು ಕೊಡ್ತಾರ ರೊಕ್ಕ? 

ಹೊಗಳಿ(ಟೀ)ಕೆ

ನಲ್ಲೆ ನೀನು ತುಂಬಾ white
ಮಾತು ತುಂಬಾ sweet sweet
ಆದರೆ ನೀನು ತುಂಬಾ short
ಪರ್ವಾಗಿಲ್ಲ ಮಾಡ್ಕೋತೀನಿ adjust
ಹೆಚ್ಚುತ್ತಿದೆ ಏಕೆ ನಿನ್ನ weight
ಮಾಡಬಾರದೇ ಸ್ವಲ್ಪ diet ?
ಏನಾದರೂ ಸರಿ ನೀ ತುಂಬಾ great
ಏಕೆಂದರೆ ಕೊಟ್ಟಿರುವೆಯಲ್ಲ ನನಗೆ ನಿನ್ನ heart <3

ಆ ತಂಪು ಸಂಜೆ

ಸಂಜೆಯಾಗಲು ಮುಳುಗಿದನು ಸೂರ್ಯ
ಆಹಾ!! ಎಂತಹ ಮನೋಹರ ದೃಶ್ಯ
ಸಂಜೆಯ ತಂಪು ಗಾಳಿ ಬೀಸುತಿರಲು
ಮೈ ಮನ ನವಿರೇಳುತಿರಲು
ಹುಲ್ಲುಗಾವಲಿನಲ್ಲಿ ಗೋವುಗಳು ಮೇಯುತಿರಲು
ಗೋಪಾಲಕನು ಕೊಳಲನ್ನು ಊದುತಿರಲು
ಎಲ್ಲೆಲ್ಲೂ ಸಂತೋಷವೇ ತುಂಬಿತ್ತು

ಮಾತಿನ ಮತ್ತು

ಎಲ್ಲೆಲ್ಲೂ ತುಂಬಿತ್ತು ಮಾತು
ಅದರಿಂದ ತಿಳಿಯಲಿಲ್ಲ ಹೊತ್ತು
ಆದ್ದರಿಂದ ಹಿರಿಯರು ಹೇಳುವರು
ಮಾತು ಮನೆ ಕೆಡಿಸಿತು 
ತೂತು ಒಲೆ ಕೆಡಿಸಿತು

ಮನುಷ್ಯ (ಮಂಗ )

ವಿಜ್ಞಾನಿ ಗಳು  ಹೇಳುವರು 
ಮಂಗನಿಂದ ಮಾನವ 
ನನ್ನ ತರಲೆ ತಮ್ಮನನ್ನು ಕಂಡು 
ನಾ ಹೇಳುವೆ 
ಅಲ್ಲಲ್ಲ !! ಮಾನವನಿಂದ ಮಂಗ 

ಮೀಯಾ೦

ನಮ್ಮ ಮನೆಯ ಬೆಕ್ಕು
ಅದರ ಹೆಸರು ರುಕ್ಕು
ಎಲ್ಲರ ಮುದ್ದಿನಿಂದ
ಈಗ ಅದಕೆ ಸೊಕ್ಕು

ಸಮ ಪಾಲು

ಗಿಡದಲ್ಲಿ ಹೂ ಜೋಡಿಕೊಂಡಿರಲು
ಅದರ ಅಂದವನ್ನು ಸಂತಸದಿಂದ ಅನುಭವಿಸು
ಕಷ್ಟದೊಂದಿಗೆ ಸುಖವಿರಲು
ತೃಪ್ತಿಯಿಂದ ಅನುಭವಿಸು

ಗಾಂಧೀಜಿ

ನಿನಗೆ ಗೊತ್ತೇ ಪಾಪು
ಇವರೇ ನಮ್ಮ ಬಾಪು
ಸ್ವಾತಂತ್ರ್ಯ ಚಳವಳಿಯಲ್ಲಿ
ಇವರೂ ನಾಯಕರು
ಸತ್ಯ ಅಹಿಂಸೆ ಎಂದು
ಸಾರಿದ ಮಹಾತ್ಮರು
ದೇಶದ ಏಳಿಗೆಗಾಗಿ
ಶ್ರಮಿಸಿದ ಪುಣ್ಯಾತ್ಮರು
ಸ್ವಾತಂತ್ರ್ಯ ಬಂದ ಮರು ವರ್ಷವೇ
ಆದರು ಹುತಾತ್ಮರು

ತಂಗಿ

ನನ್ನ ತಂಗಿ ಆಶಾ
ಅವಳಿಗಿಷ್ಟ ಸಮೋಸ
ಮಾಡಿದ್ರೆ ಆಟದಲ್ಲಿ ಮೋಸ
ಕೊಡುವೆ ಸಕತ್ತಾಗಿ ಗೂಸ

ಚಿಂತೆಯ ಕಂತೆ

ಇಂದಿಗೆ ಮುಗಿಯಿತು ಟೆಸ್ಟ್
ನಾಳೆಯಿಂದ ರೆಸ್ಟ್
ಮುಂದಿನ ತಿಂಗಳು ಇದೆ  ಎಗ್ಜ಼ಾಮ್
ನನ್ನ ತಲೆ ಆಗುವುದು ಟೆನ್ಶನ್ನಿಂದ ಜಾಮ್    

ಇಷ್ಟ - ಕಷ್ಟ

ಇಷ್ಟ ಇಷ್ಟ ನನಗೆಲ್ಲರು ಇಷ್ಟ
ತಿಂಡಿ ಕೊಡುವ ಅಮ್ಮನು ಇಷ್ಟ
ಐಸ್ಕ್ರೀಮ್ ಕೊಡಿಸುವ ಅಪ್ಪನು ಇಷ್ಟ
ಚಾಕ್ಲೇಟ್ ಕೊಡಿಸುವ ತಾತನು ಇಷ್ಟ
ಮುದ್ದು ಮಾಡುವ ಅಜ್ಜಿಯು ಇಷ್ಟ
ತರಲೆ ಮಾಡುವ ಅಣ್ಣನು ಇಷ್ಟ
ಆದರೆ , ಇವರೆಲ್ಲ ಶಾಲೆಗೆ ಹೋಗು
ಎನ್ನಲು ಬಲು ಕಷ್ಟ

ನಲ್ಲೆ

ನಲ್ಲೆ ,
ನಿನಗಾಗಿ ನಾನಿಲ್ಲೇ
ಕಾಯುತಿರುವೆನಲ್ಲೇ
ನಿನ್ನ ಮರೆವಿಗಿಲ್ಲ ಎಲ್ಲೆ

ಗುಂಡ

ಪಕ್ಕದ್ಮನೆ ಗುಂಡ
ಅವನೋ ಪೋಲಿ ಪುಂಡ
ಕೊಟ್ಟರೆ ಬಿಸಿ ಬಿಸಿ ಬೋಂಡ
ಹೂಡುವ ನಮ್ಮನೇಲೇ ಝಾಂಡ
ಅಬ್ಬಬ್ಬ !! ಇವನೆಂತಹ ಮೊಂಡ

ನಲ್ಲೆ

ನಿನ್ನ ನಗುವೆಷ್ಟು ಚೆಂದ
ಅದರ ಮುಂದಿಲ್ಲ ಈ ಹೂವಿನ ಅಂದ

ಬಾಳು

ಜೀವನವೆಂಬ ಕಡಲಿನಲ್ಲಿ
ತೊಂದರೆಯ ಸುಳಿ ಇರುವುದು ಸಹಜ
ಆದರೆ ನೀನು ನಿನ್ನ ಜಾಣ್ಮೆಯಿಂದ
ಅದನ್ನು ದಾಟು ಮನುಜ

ಜ್ಞಾನ

ಬಾಳೆಂಬ ಕತ್ತಲೆಯಲ್ಲಿ
ಶಾಲೆಯೆಂಬ ಎಣ್ಣೆ ತುಂಬಿದ ಹಣತೆಯಿಂದ
ವಿದ್ಯೆಯೆಂಬ ಬತ್ತಿ ಇಟ್ಟು
ಜ್ಞಾನವೆಂಬ ದೀಪ ಬೆಳಗಿಸಲು
ನಮ್ಮ ಭವಿಷ್ಯ ಪ್ರಕಾಶಮಾನ

ಮಳೆ

ಮಳೆ ಬಂತು ಮಳೆ
ಊರು ತುಂಬಾ ಹೊಳೆ
ಬೀದಿಯಲಿಲ್ಲ ಕಳೆ
ಎಲ್ಲರ ಬಟ್ಟೆ ಕೊಳೆ
ಮಕ್ಕಳಿಗುಂಟು ರಜೆ
ಆದರೂ ಇದು ಒಂದು ಸಜೆ

ಪುಟ್ಟಿ - ಬುತ್ತಿ

ಬಂದಳು ನಮ್ಮಯ ಪುಟ್ಟಿ
ಕೈಯಲಿ ಹಿಡಿಡಳು ಬುಟ್ಟಿ
ಮಾಡಲು ಅಮ್ಮನು ರೊಟ್ಟಿ
ಕಟ್ಟಿದಲೊಂದು ಬುತ್ತಿ
ಗದ್ದೆಗೆ ಒಯ್ದಳು ಬುತ್ತಿ
ತಿನಿಸಿದಲಪ್ಪಗೆ ರೊಟ್ಟಿ

ರೊಟ್ಟಿ

ರೊಟ್ಟಿ ರೊಟ್ಟಿ ಬಿಸಿ ಬಿಸಿ ರೊಟ್ಟಿ

ಅಮ್ಮನು ಮಾಡಿದ ಪುಟಾಣಿ ರೊಟ್ಟಿ

ಕೈಯಲಿ ಅದನು ತಟ್ಟಿ ತಟ್ಟಿ 

ಮಾಡಿದಳಮ್ಮ ರುಚಿ ರುಚಿ ರೊಟ್ಟಿ

ಅಪ್ಪನು ಮೆಚ್ಚುವ ರಾಗಿ ರೊಟ್ಟಿ 

ತಮ್ಮನು ಹೋಗಳುವ ಅಕ್ಕಿ ರೊಟ್ಟಿ

ಕಾವಲಿ ಮೇಲೆ ತಟ್ಟಿ ತಟ್ಟಿ

ಮಾಡಿದಳಮ್ಮ ರುಚಿ ರುಚಿ ರೊಟ್ಟಿ

ಅಜ್ಜಿಯು ಮೆಚ್ಚದ ತಿಂಡಿ ರೊಟ್ಟಿ

ತಾತನು ಜಗಿಯಾದ ಗಟ್ಟಿ ರೊಟ್ಟಿ

ಕೈಯಲಿ ಅದನು ತಟ್ಟಿ ತಟ್ಟಿ

ಮಾಡಿದಳಮ್ಮ ರುಚಿ ರುಚಿ ರೊಟ್ಟಿ

ತಿನ್ನೆನು ಎಂದಿಗೂ ಗಟ್ಟಿ ರೊಟ್ಟಿ

ಅಮ್ಮ ಮಾಡುವಳು ಮೃದು ಮೃದು ರೊಟ್ಟಿ

ನನ್ನಯ ನೆಚ್ಚಿನ ತಿಂಡಿ ರೊಟ್ಟಿ

ಆಹಾ! ಘಮ ಘಮ ಪರಿಮಳದ ರೊಟ್ಟಿ

ತಾತ

ನನ್ನಯ ಮುದ್ದಿನ ಮಿಲಿಟ್ರೀ ತಾತ
ಡಿಸಿಪ್ಲೀನ್ ಎನ್ನುವರು ಸದಾ ಈತ
ಆದರೆ ದೊಡ್ಡ ತಿಂಡಿ ಪೋತ
ಯಾವಾಗಲೂ ಹೇಳುವರು ಜೈ ಭಾರತ್ ಮಾತಾ

ಟೋಪಿ

ಬಹಳ ಹಿಂದೆ ಜನರು ತೊಡುತಿದ್ದರು
ಗಾಂಧೀಜಿ ಟೋಪಿ
ಇಂದಿನ ಜನರು ತೊಡದಿದ್ದರೂ
ಹಾಕುವರು ಇತರರಿಗೆ ಟೋಪಿ !!!

ಅಂತರ

  ಮಾತು ಮೌನಗಳ ನಡುವೆ

ಇರುವುದೊಂದೇ ಅಂತರ

ಮಾತು ಭಾಷೆಯ ಕೊಂಡಿಯಾದರೆ

ಮೌನ ಭಾವನೆಗಳ ಕೊಂಡಿ