ನೆನಪಿನರಮನೆ

ಹೊಕ್ಕೆ ನಾ ನೆನಪುಗಳ ಅರೆಮನೆಯ ಅಲ್ಲಿದ್ದದ್ದು ಎರಡೇ ಕೋಣೆಗಳು

ಮೊದಲ ಕೋಣೆಯಲಿ ಹಾಲ ಬೆಳದಿಂಗಳು ಸಂತಸದ ನಗೆಹೊನಲು ಮನಃಪಟಲದಲ್ಲಿ ಎಳೆ ಎಳೆಯಾಗಿ ಬಿಡಿಸಿಕೊಂಡಿತು ಸಿಹಿ ನೆನಪುಗಳು ಮೆಲುಕು ಹಾಕಿದಷ್ಟೂ ಸವಿ ನೆನಪುಗಳು ಹೃದಯ ಅರಳಿಸಿ ತಂಗಾಳಿ ಮೈಸೋಕಿಸಿ ತಂಪೆರೆಯಿತು

ಎರಡನೆಯ ಕೋಣೆಯಲಿ ಗಾಢಾಂಧಕಾರ ಅವಮಾನ ನೋವು ನಿರಾಸೆ ಜಿಗುಪ್ಸೆ ದುಃಖದ ಚೀರಾಟ ಕಹಿನೆನಪುಗಳು ಬೆಂಕಿಗೆ ಮೈಯೊಡ್ಡಿದಂಥ ಅನುಭವ ಹೃದಯ ಭಾರ 

ಆದರೆ, ಕಹಿನೆನಪುಗಳು ಕರಿನೆರಳಾಗಿ ಬೆಂಬಿಡದೆ ಕಾಡಿದರೂ ಸಿಹಿನೆನಪುಗಳ ತಂಗಾಳಿ ಆಗಾಗ ತಂಪಿತ್ತಿದೆ

ನೆನಪುಗಳಿರದ ಜೀವನವೆಲ್ಲಿ ನೆನಪೇ ಶಾಶ್ವತ ಕೊನೆಗಿಲ್ಲಿ